उपत्यकासहित विभिन्न ठाउँमा थप २७ जना कोरोना संक्रमित भेटिए, संक्रमितको संख्या ४०२ पुग्यो
मंगलबार कोरोनाभाइरसका थप २७ जना संक्रमित भेटिएका छन् । उपत्यका भित्रका तीनै जिल्ला र बाहिरका विभिन्न जिल्लामा गरी २७ जना संक्रमित भेटिएका हुन्।
मंगलबार काठमाडौंमा ३ जना, भक्तपुर र ललितपुरमा १र१ जना गरी उपत्यकामा ५ जना कोरोना संक्रमित भेटिएका छन् भने बाँकी संक्रमित बाहिर जिल्लाका छन् । स्वास्थ्य मन्त्रालयका अनुसार ललितपुरमा कोरोनाभाइरसको संक्रमण पहिलो पटक देखिएको हो।
त्यस्तै संक्रमित भेटिएकाहरू झापामा ९, मोरङ १, सुनसरी १, सर्लाही २, मकवानपुर १, रामेछाप १, सिन्धुली १, लमजुङ १, नवलपरासी १ र कपिलवस्तुमा ४ जना छन्। आज थपिएका मध्ये २४ पुरूष र तीन महिला छन्।
योसँगै नेपालका ३६ जिल्लामा फैलिएको कोरोना संक्रमितको संख्या ४०२ पुगेको छ भने २ जना संक्रमितको मृत्यु भइसकेको छ ।