महेन्द्रनगर । कैलाली र कञ्चनपुरका सहकारीहरुका व्यवस्थापकहरुको लागि सम्पत्ति व्यवस्थापन दायित्व सम्बन्धि दुई दिने तालिम शुक्रबारदेखि सुरु भएको छ । को-अपरेटिभ म्यानेजर्स क्लबले राष्ट्रिय सहकारी बैंकको आयोजना गरेको तालिममा दुबै जिल्लाका ४० बढी सहकारीका व्यवस्थापक÷प्रबन्धकहरु सहभागी भएका छन् ।
राष्ट्रिय सहकारी बैंकका प्रमुख कार्यकारी बद्री कुमार गुरागाईले तालिम उद्घाटन गरे । उनले बैंकले पूर्व पश्चिम नहेरी कर्जा दुरुपयोग नहुने गरी लगानी गर्ने बताए ।
‘सहकारीले कसरी कर्जा लगानी गर्नु पर्छ, त्यसमा हामी सबै क्लियर नै छौ, विना धितो कर्जा दिनु हुँदैन भन्ने कुरा छैन, पूर्व र काठमाडांै जस्तो पनि भनेका छैनौ’ उनले भने,‘विना धितो लगानी गर्न सकिन्छ, उप समितिले के भन्छन, त्यसका आधारमा अघि बढ्न सकिन्छ, पूर्व पश्चिम भन्ने कुरा नै आउँदैन ।’
![](https://deshpati.com/wp-content/uploads/2024/02/IMG_20240223_101427-1024x771.jpg)
सहकारी बैंकले ऋण लगानी भएपछि त्यसको सदुपयोग हुनु पर्ने कुरालाई प्राथमिकता दिएको उल्लेख गर्दैै उनले दुरुपयोग गर्न नहुने बताए ।
बैंकले सहकारी ऐनमा साना सहकारीलाई लगानी अधिकार छाड्नु पर्ने र ठूलालाई अनुशासित बनाउनु पर्ने जोड दिएर सुझाव दिएको उनले बताए ।
कार्यक्रममा राष्ट्रिय सहकारी विकास बोर्डका सञ्चालक दशरथ भण्डारीले अहिले सहकारी संस्थामाथि चौतर्फी आक्रमण बढेको उल्लेख गर्दै आफ्नो सहकारी आफैंले जोगाउनु पर्ने अवस्था आएको बताए ।
सहकारी बैंकले सहकारी संस्थाको निक्षेप संकलन गरी सोही अनुसार जिल्लामा लगानी गर्नु पर्नेमा ६० प्रतिशत रकम बाहिर लगानी भएको सञ्चालक भण्डारीले बताए ।
बोर्डका सञ्चालक भण्डारी सहकारी संस्थामा नेताहरुको वर्चश्व भएको उल्लेख गर्दै सहकारी संस्थालाई निष्पक्ष हाँक्न सक्ने जनशक्ति आउन नसकेको बताए ।
![](https://deshpati.com/wp-content/uploads/2024/02/IMG_20240223_100832-1024x771.jpg)
राष्ट्रिय सहकारी महासंघमा पैसाका लागि जाने प्रवृत्ति हावी भएको उल्लेख गर्दै उनले सहकारी महासंघ सहकारी संस्थाको पक्षमा हुनु पर्ने बताए ।
विशिष्ठकृत सहकारी संघका अध्यक्ष एबम् उदयदेब बहुउद्देश्यीय सहकारीका संस्था लि. का प्रमुख कार्यकारी गणेश बहादुर चन्दले सहकारीमाथि चारैतिरबाट आक्रमण भएकाले वर्तमान अवस्थामा सहकारी संस्थाहरु जटिल अवस्थामा भएको बताए । ‘यस्तो अवस्थामा तालिम गरिएको छ, यसले केही न केही रुपमा सहयोग गर्छ’ उनले भने ।
सहकारी बैंकले धितो विना कर्जा दिने रोकेकोमा चन्दले असन्तुष्टि व्यक्त गरे । उनले सहकारीका ऐन नियम बाहिर गएर सञ्चालन गर्दा समस्या देखिएको उल्लेख गरे ।
कञ्चनपुर बहुउद्देश्यीय सहकारी संघका अध्यक्ष प्रेम सिह भाटले सहकारी संस्थाका लागि आगामी वर्षभित्र कर्जा सूचना केन्द्र र ऋण अशुली प्राधिकरण स्थापना गर्न पर्नेमा जोड दिए ।
भीमदत्त नगर सहकारी सञ्जालका अध्यक्ष ईश्वरी प्रसाद खरेलले सहकारी संस्थाप्रति वितृष्णा फैलाउने अभियान सञ्चालन भएको उल्लेख गर्दै त्यस विरुद्ध सशक्त भएर उभिनु पर्नेमा जोड दिए ।
![](https://deshpati.com/wp-content/uploads/2024/02/IMG_20240223_100814-1024x771.jpg)
‘सहकारीमाथि अहिले चुनौती आएको छ, त्यसलाई चिरेर जानु पर्ने अवस्था छ । अहिले सहकारीप्रति वितृष्णा फैलाउने अभियान नै चलेको छ’ उनले भने,‘यो तालिमले सहकारीलाई व्यवस्थापन गर्ने कुरामा सहयोग पुग्छ ।’
सहकारीका व्यवस्थापक र सञ्चालकको असल नियतले काम गरे समस्या नहुने उल्लेख गर्दै उनले सरकारको सहकारीलाई हेर्ने दृष्टिकोण सही नभएको खरेलको भनाई थियो ।
सहकारी संस्थाका लागि पाँच तारे होटेलमा सञ्चालन हुने तालिमप्रति आक्रोश पोख्दै खरेलले ती तालिममा भात खाने बाहेक अन्य उपलब्धि नहुने बताए ।
उनले सहकारीका तालिम होटेलका हलमा नभएर सहकारीका हलमा गराउनु पर्ने बताए ।
भीमदत्त नगरपालिकाको सहकारी शाखाका प्रमुख बिमला भाटले नगरपालिकाले सहकारीहरुका लागि दुई वर्षसम्म तालिम सञ्चालन समेत गर्न नसकेको उल्लेख गर्दैै आगामी दिनमा क्षमता अभिवृद्धिका कार्यक्रम गरिने बताइन् ।
को अपरेटिभ म्यानेजर्स क्लबका अध्यक्ष सुनिल कुमार सेठीको अध्यक्षतामा कार्यक्रम गरिएको छ । कार्यक्रममा स्वागत मन्तव्य राख्दै सेठीले तालिमबाट सहकारी संस्थाका व्यवस्थापकहरुको क्षमता अभिवृद्धि हुने विश्वास व्यक्त गरे । उनले सहकारी बैंकले पनि धितो विना ऋण नदिने गुनासो सहकारीबाट आएको उल्लेख गरे ।
क्लबका सचिव मदनराज भट्टले कार्यक्रम सञ्चालन गरेका थिए । कार्यक्रममा राष्ट्रिय सहकारी बैंकका प्रमुख कार्यकारी गुरागाई र बल्लभ तिमल्सेना प्रशिक्षक छन् ।
तालिममा सहकारी व्यवस्थापन, चुनौती, वासलात, आय विवरण, सम्पत्ति दायित्व व्यवस्थापन, तरलता व्यवस्थापन लगायतका विषयमा प्रशिक्षण दिइने म्यानेजर्स क्लबका अध्यक्ष सेठीले बताए ।